АКШ-Орусия саммити өтө турган Аляска штатындагы Анкориж шаарында Украинага колдоо көргөзүп, бул шаарга Путиндин келишине каршылык билдирген акцияга жүздөгөн киши катышты. Митингдин уюштуруучусу, Stand UP Alaska коомдук уюмунун жетекчиси Эрин Жексон-Хилл журналисттерге орус президенти Владимир Путинди согуш кылмышкери деп эсептээрин, "андай адамга Америка жергесинде орун жок" деген пикирин билдирди. "Авторитардык диктаторлордун Аляска штатына келишине каршыбыз, айрыкча аларды биздин губернатор, же Конгресстеги өкүлдөрүбүз чакырбаган соң", - деп басым жасады Хилл.
Аляска штатында миңге жакын украин качкындары башпаанек тапкан. Кечирээк штаттын борборунда дагы бир нааразылык акциясы өтөөрү күтүлүүдө.
Орусиянын президенти Аляскага баратып, жолдо Магадан шаарына токтоду. Ал жерде аймак жетекчилери менен кеңешме өткөрөөрү белгиленген. Жума күнү эртең менен Аляскага Орусиянын тышкы иштер министри Сергей Лавров, коргоо министри Андрей Белоусов жана финансы министри Антон Силуанов учуп барышты.
15-августка караган түнү Орусиянын Курск шаарында он кабаттуу үйгө тийген дрондон имараттын төрт кабаты өрттөнүп, бир киши каза таап, он киши жараат алды. Маалыматты облустун губернаторунун милдетин аткарып жаткан Александр Хинштейн ырастады. Бул күнкү соккулардан Курск облусунда ондон ашуун имарат, арасында мектеп, бала бакча, оорукана жабыр тартканы кабарланды.
Украин армиясынын пилотсуз истребителдери, дрондору Самарадагы мунай иштетүүчү ишканага, Белгород, Самара, Тамбов, Волгоград облустарындагы курулуштарды бутага алганы кабарланды. Орусиянын Коргоо министрлиги өткөн түнү 53 украин дрону асманда жок кылынганын билдирди.
Украинанын Коргоо министрлиги орус армиясы өткөн түнү эки баллистикалык ракета, 97 дрон менен чабуул койгонун, 64 дрон атып түшүрүлгөнүн, калган соккулар 13 райондо жоготуу, кыйроого алып келгенин маалымдады.
Украинанын президенти Зеленский соцтармактарга туткундан бошотулган адамдардын сүрөттөрүн жарыялады, 84 кишинин арасында аскер адамдары, жай тургундар да бар. Алардын айрымдары 2014, 2016, 2017-жылдары туткундалса, тизмеге кийин Мариуполду коргоого катышкандар да кошулду. 51 аскер эмес адамдар арасында медиктер, саясий көз карашы үчүн кармалгандар, аялдар да бар.
Орусия бошотуп алгандар арасында Крымдын мурдагы ички иштер министринин орун басары Николай Федорян бар экенин украиналык маалымат каражаттары кабарлашты. Ал Украинада мамлекетке чыккынчылык кылганы үчүн 12 жылга абакка кесилген.
Соңку айларда Орусия менен Украина бир нече жолу туткундарды айырбаштады, андай тизмеге оор жарадар болгондор, оорулуулар, өлгөндөрдүн сөөктөрү да киргизилди. Бул жараяндар эки өлкөнүн расмий делегациялары Стамбулда 23-июлда жолуккандан кийин ишке ашырылды.
Евробиримдиктин лидерлери жана АКШ президенти менен өтө турган онлайн саммитке катышуу үчүн украин лидери Владимир Зеленский Берлинге барды. Вашингтон бир аздан кийин Трамп онлайн режимде бул саммитке кошулаарын ырастады. АКШ президенти Зеленский менен өзүнчө сүйлөшөөрү да белгиленген.
Украинадагы согушту токтотуу жолдорун талкуулай турган 15-августтагы АКШ-Орусия президенттеринин жолугушуусун утурлай буга чейин Евробиримдик лидерлери Зеленский менен өзүнчө сүйлөшкөн. Анда макулдашылган шарттарды Трамп менен талкуулаган соң Германиянын канцлери Фридрих Мерц жана Владимир Зеленский Берлинде биргелешкен маалымат жыйынын өткөрөөрү белгиленген.